محطة مصر ... قلب اسكندرية النابض

أهلا يا جماعة والله ليكم وحشة من زمان مقعدناش سوا لكن والله ظروف وانتم كلكم طبعا عارفين ان اكل العيش مر والرزق يحب الخفية خصوصا في الأيام السودة اللي احنا عايشينها وبلدهم اللي بتتقدم بيهم ونسيت تاخدنا معاها.
المهم النهاردة أنا حبيت أكشف ليكم أسرار اسكندرية اللي محدش يعرفها الا احنا طبعا كلكم دماغكم راحت لبعيد اللي خياله سرح لحد سموحة وزهران مول وجرين بلازا والكافيهات اللي هناك ومنكم اللي فكر في كارفور والداون التاون و فايف سيكريت و طبعا دي كلها حتت طرية جدا و مليانة مزز جامدة جدا وحريم موز موز موز على رأي عمرو أديب و في أماكن من دي تعقد فعلا ونصيحة من أخ متروحش هناك لو معاكش نصك الحلو عشان أعصابك متتعبش ... وبرغم اني معترف انها أماكن جميلة ومسلية وآخر روشنة بس ده ميمنعش انها أماكن مستنسخة من عباس العقاد في القاهرة ومفيهاش ريحة اسكندرية ولا بصمتها حتى سان استيفانو بتاع طلعت مصطفى برضه نسخة من مولات وفنادق القاهرة وشرم وعشان كدة الأماكن دي مش أسرار ولا حاجة.
سامعك ياللي بتقول المنتزة والمعمورة وهي أماكن جميلة جدا وبحبها جدا بس برضة مش هي اللي اقصدها أولا الدخول بباصات يعني ثلات ارباعنا مش بيخشها الا كل فين وفين والمعمورة حتلاقي فيها ملاكي اسكندرية أقلية وسط طوفان الغزاة قاهرة جيزة قليوبية غربية وممكن قنا وأسوان كمان وبعدين الأماكن دي يلزمها عربية ولو معاك مزز يكون أفضل ده غير انك حتكع جامد أقله بنزين العربية وبرضه دول مش من أسرار اسكندرية لأن أي حد ميعرفش حاجة في اسكندرية يعرف المعمورة والمنتزة وسمع أكيد عنهم.
أنا بتكلم هنا عن حتت في اسكندرية ميعرفهاش الا الاسكندرانية ومش أي اسكندرانية كمان لأ ولادها اللي بجد ... حتت ممكن غيرنا يمر عليها مرور الكرام أو حتى ميمرش عليها أساسا ولو عدى عليها مش ممكن ياخد باله منها خالص ... وبصراحة احترت جدا أبتدي بأنهي مكان عشان الأماكن كتير بس طبعا مكنش ممكن أبدأ بأي مكان قبل المكان ده ... محطة مصر.
محطة مصر في قلب كل اسكندراني حيث تجتمع كل أنواع المواصلات اوتوبيسات ميني باصات مشاريع تونايات ده غير القطر وبصراحة مش ناقصها غير مطار عشان تبقي كملت ... ومن محطة مصر تقدر تروح أي مكان في الدنيا حتي زحل ممكن تركبله مشروع محطة بلوتو سريع ينزلك على أول زحل ... يعني موقف .. عامرية .. أبوقير .. بشر .. حضرة .. بحري .. كله موجود يا معلم حتى مشاريع التويوتا الجديدة برضه موجودة هناك و والله أحلي من السوبرجيت .. ده غير الترام الأصفر العجيب اللي لو حبيت تركبه يا ريت متكونش مستعجل لأنه ماشي بالبركة يوصلك في يوم اتنين ثلاثة وماله علي رأي داليدا ورانا ايه ورانا ايه ركوبة مرحرحة كدة تحسسك انك رجعت 50 سنة ورا أيام الخير لما كان ربنا مبارك للناس في كل حاجة حتي وقتها برااااااااااااااح ع الآخر ... طبعا محطة مصر المفروض انها نسخة من رمسيس في القاهرة بس ده مش صحيح عشان النسخة الاسكندراني بجد ومن غير تحيز دمها أخف بكتير و روحها أجمل من رمسيس مليون مرة ومفيش وجه مقارنة من أساسه ... انت تنزل رمسيس تحس حد رماك في خلاط شغال على أقصى سرعة وتحس انه مكان جامد مفيهوش روح .. صحيح زحمة لكن مفيش فيه ونس ... ده بقى مختلف خالص عندنا في اسكندرية .. خليط عجيب مستنيك هنا .. قهاوي و محلات أكل وشرب و سنترالات وسوق باب عمر باشا .. زحمة و ونس و كل حاجة موجودة من الابرة للصاروخ لو حبيت تجيب لبن العصفور أكيد حتلاقيه موجود.
انا طبعا عايز أوريكم كل ركن في محطة مصر و أكشفلكم كل أسرارها بس بجد مش عارف أبدأ بايه... المدهش ولا القهوة العالية أم سلالم (على فكرة دي بجد اسمها كدة) ولا هريسة العصافيري ولا حلواني الرضا ... آخ نسيتوني القهاوي اللي ف قلب محطة مصر اللي ملهاش اسم لكنها أشهر من نار على علم ... ع العموم حنبدأ واحدة واحدة عشان مننساش .
نفترض انك لسه جاي من مصر سواء بالقطار أو التويوتا الجديدة و نقولك حمد الله ع السلامة اسكندرية نورت تحب تعمل ايه دلوقت؟شكلك جعان؟أحب اطمنك ان كله موجود بس مش معقول تكون هنا ومتجربش المدهش اللي هوه اسم على مسمى وتاكل عنده طبق كشري مصراوي بالدقة ولا طبق مكرونة بالصلصة واللحمة المفرومة و على فكرة المدهش ده جامد قوي و واخد جايزة نوبل في دقة الكشري و طبعا المطعم الأصلي موجود في قلب المحطة له مداخل كتير ومفيش أي باب لأنه مش بيفضى على مدار 24 ساعة شغال ... وطبعا لو سيادتك تنك مش حابب تقعد في الشعبي المدهش حل مشكلتك وفتح فرعه الجديد في وش المحطة دورين حاجة آخر آلاجة وبيقدم الأصناف الأصلية بتاعته كبدة كشري وطبعا الفول والفلافل و لو كنت من الشباب الايزي موزو بتوع الفطير والكباب والكفتة والفراخ المشوية الخ الخ الخ ... برضه عنده بس منصحكش ... آه بالحق قبل مانسى طبعا المدهش الأصلي هوه اللي ف نص المحطة وفرعه اللوكس في وش المحطة ده عشان حتلاقي في كذا مدهش المدهش ابو سعيد والمدهش ابو أحمد والمدهش أبو أي حاجة وكل دول تقليد للمدهش الأصلي ... عشان كدة يا جماعة خدوا بالكم واحذروا التقليد قبل الشراء.
طبعا بعد الكشري ما كبس على نفسك وبعد الشطة ما قطعت معدتك أكيد عيز تحلي بقك و هنا لازم حتحتار ... عندك هريسة العصافيري و ده اكبر من مجرد حلواني ده معلم من معالم محطة مصر ... بيتوصف بيه وبتتاخد قدامه مواعيد بس مشكلته انه بيقفل بدري جدا يعني غالبا حتلاقيه قافل وهنا قدامك تحلي بألذ فطير بالسكر موجود فيكي يا جمهورية وده منتشر حتلاقي كل 20 متر في المحطة واحد واقف بفرن وبيبيع الفطيرة بنص جنيه يا بلاش والله اتنين منها يقفلو معاك 6 ساعات قدام ... بس بما انك مستجد منصحكش تتقل كفايه عليك واحدة عشان لو اتزنقت وقلبت معاك باسهال حتكون في ورطة كبيرة ولو كان حاجة تانية كنا عديناها لكن اسهال حنعمل فيه ايه يا فالح ... أما لو كنت متعب وتنك و مبتحبش تاكل من الراجل الوحش اللي في الشارع خلاص هات من عند فطاطري سمارة اللي بين العصافير والقهوة العالية أم سلالم وحاجته كويسة و مقارنة بأسعار المنطقة يعتبر غالي ... أما لو حبيت تشرب خلاص مفيش مانع ... عندك بتوع الحاجة الساقعة و محلات العصير كتير جدا ... بس الراجل اأبو عربية بتاع شوب المانجة ب 75 قرش آه والله زي ما سمعت ب 75 قرش مالوش حل ... وطبعا لو عايز تهادي عندك سلسلة محلات الرضا وكلهم ورا بعض ... طبعا حتخش تقوم جايب منه هريسة وبسيمة وحجازية بس لو عايز رأيي أنا حجيبلك م الآخر اوعى تروح الرضا ومتجربش المعمولة ... بجد تحفة هي غليت دلوقت الواحدة بربع جنيه بس تستاهل خصوصا انها دايما طازة ... طبعا سيادتك متعرفش المعمولة وعشان متقلقش دي عبارة عن قرص محشية وهنا لنا وقفة عشان العبارة في الشيكارة قصدي السر في الحشو اللي هوه سر ... بجد حتعجبك جرب بس و على ضمانتي آدينا كده كلنا وشربنا وحلينا ناقصك حاجة تانية.
بتقول عايز تشدلك حجرين على أي قهوة وماله يا معلم حقك القهاوي كتير طبعا في مجموعة القهاوي اللي وسط المحطة نفسها ودي مالهاش اسم ولا وصف ومبتفضاش ومفيش فيها مكان لحد عشان زباينها بتحجز بالسنة يعني اللي بيقعد على أي قهوة من دول ممكن يفضل قاعد لما شاء الله ... دي عالم فاضية يابا والزبون بيدفع ايجار بالشهر وبصراحة القهاوي دي متخصصة بالضبط زي قنوات النيل المتخصصة ... كل واحدة مشغلة تليفزيون وفيديو 24 ساعة اللي أفلام هندي واللي مصارعة محترفين بس حريمي واللي افلام كاراتيه من بتاعة بروس لي وتلاقي كل اللي في القهوة بيتفرج ومركز ع الآخر ... لو رميت الابرة ترن ... وبشري لزوار محطة مصر الكرام في قهوة منهم غيرت وطورت ومشغلة 24 ساعة رقص بلدي من اللي يقطع القلب وصاحبها بيحط شرايط لرقاصات جامدين طحن بس دي قهاوي ليها ناسها يعني متنفعناش خالص ... والله منين ماعدي في الحتة دي أحس ان نفس الناس بيتفرجوا على شريط فيديو طلعت روحه وبيتمنى يسف عشان يخلص من العذاب اللي هوه فيه بقالهم ييجي 100 سنة وممكن يفضلو 100 سنة كمان ع الحال ده ... لا الحجر بيخلص ولا الشريط بيسف ولا القهوة بتقفل ولا الناس دي بتروح.
تعالى بس معايا يلا نعدي احنا دلوقت واقفين قدام القهوة العالية أم سلالم ووالله هي اسمها كدة حتى اقرا اليافطة لو مش مصدقني وهي راكبة المحطة ... يعني تقعد فيها تلاقي قدامك فيو محصلش ... المشاريع والسريحة و الناس ... تحس انك عليت مش بقولك عالية و أم سلالم بس بيني وبينك انا عمري ما قعدت عليها ... يمكن عشان زحمة قوي ... أنا عندي قهوتي في المنطقة دي اللي مبغيرهاش ... قهوة هادية ومستوى ... قهوة بطاطا ودي قدام شوية وانت رايح ع الرصافة بعد ما تعدي أنا ميشو.
بتسأل على ايه؟آه الشوبنج يا ختي كميلة حبيب ماما انت ... وهوه في شوبنج زي اللي ممكن تعمله في محطة مصر ... انت هنا تلاقي أي حاجة وكل حاجة و بنص السعر وربنا يباركلنا في الصين عايز ايه؟هدوم وكوفيات و جوانتيات ولكاليك؟عايز مركوب؟كله موجود كوتشيات جزم شباشب صنادل كونترات ... لعب أطفال أشكال و ألوان ... أجهزة كهربائية من كل صنف ريموتات كاسيتات كشافات يعني لو عايز الدنيا وحابب تهادي قطتك محلات الدباديب والبارفانات مرطرطة ولو عايز الآخرة برضه طلبك موجود المحلات بتبيع كل شيء مصاحف كتب دينية سيديهات شرايط قرآن مصليات ... ده غير سوق باب عمر باشا حيث كل شيء موجود يعني نقي و فاصل وشيل علي كيف كيفك
... وكله في الحنين لأن شعار الجميع هنا نحن نحطم الأسعار تحطيما يعني تاخد من عبد الله و تتكل على الله ... ويا سلام لو حظك خدمك وعديت هنا في أيام مميزة زي رمضان ولا العيد ولا مولد النبي عليه الصلاة والسلام ... حتشوف منظر تاني أنوار وزينات و روح تانية خالص ... ع العموم آديك عرفت حاول تجينا في الأيام دي وصدقني مش حتندم.
أظن أنا كده عملت الواجب وزيادة اكلتك وشربتك وكمان عدلت دماغك بحجرين يعني مش فاضل غير اني أروحك ولو ان دي سهلة جدا عشان من هنا ممكن تروح أي مكان في الدنيا وبكل سهولة ... اتمني تكونو انبسطتو واكون قدرت اوريكم محطة مصر جديدة غير اللي انتم بتشوفوها و اوعدكم اني حوريكم حتت في اسكندرية عمركم ما شفتوها ... يا رب اسمع منكم تعليقاتكم و قولولي تحبو تروحو فين المرة الجاية أنا تحت أمركم ... تصبحو على خير ول سنة وانتم طيبين.

عاشت اسكندرية حرة مستقلة

في البداية احب اهنيء الشعب السكندري العظيم في هذة الذكرى الغالية اللي هي عيد تحرير الاسكندرية وقبل ما تتذاكي وتعمل فيها مفتح وتقول انك عمرك ما سمعت غير عن عيد تحرير سينا وده طبعا مش عشان حضرتك مثقف لا سمح الله ولا حتي بتحب تاريخ بلدك وحافظه صم انما كل الحكاية انك بتاخد اليوم ده أجازة والتليفزيون بيجيب الكام فيلم اياهم اللي حفظناهم صم من أيام ما كنا في الحضانة اعدام ميت وأبناء الصمت والرصاصة لا تزال في جيبي والفيلم بتاع هي دي مصر يا هبلة قصدي يا عبلة المهم احب اضيف لمعلوماتك ان اسكندرية بتحتفل بالمناسبة دي في أوائل سبتمبر من كل عام بعد جلاء آخر مصيف من أراضيها ودي المناسبة اللي فعلا بيحتفل بيها كل سكندري بعد تحرير مدينتنا الحبيبة من الغزاة الغاصبين اللي نزلوا على البلد زي القضا المستعجل وطبقوا علي مراوحنا طول الشهور اللي فاتت وبكده تقدر مدينتنا الغالية تشم نفسها واحنا كمان نشم نفسنا فيهاو ننسى اللي قاسيناه طول الصيف من زحمة ورخامة وسماجة وحاجات ميعلمش بيها غير ربنا وكفايه اننا بنكره الصيف مووووووووووووت وبنحب الشتا زي عينيناو بنستناه بفارغ الصبر.
طبعا حضرتك بينك وبين نفسك بتقول ايه الشعب الغريب ده أو بتفتكر المثل بتاع مية مالحة و وشوش كالحة مانت مش حاسس بحاجة منجعص ع الفوتيه و مأنتخ في التكييف و مش ممكن تتصور احنا بنتبهدل اد ايه في الصيف يا راجل داحنا من غلبنا بنطفش من اسكندرية في الصيف ونسيب للجحافل اللي احتلتها الجمل بما حمل واللي عنده مكنة في مارينا ولا الساحل الشمالي طيران على هناك واللي معندوش عليه وعلي مطروح وآهي كلها أيام سودة لحد ما ييجي فرج ربنا ويبدأ الشتا اللي بجد مفيش زيه هنا في اسكندرية.
طبعا مش مصدقني وفاكرني بابالغ بس والله أبدا انت مش ممكن تتخيل الزحمة لأن أول ما الصيف يهل والدراسة تخلص وتبدأ الأجازات تبدأ مأساة أهل اسكندرية اللي خلدها الشعرا واللي لخصها فنان الشعب أحمد عدوية في رائعته زحمة يا دنيا زحمة وفعلا اسكندرية بتبقى مليطة يا معلم ميغة وكانها بلد ملهاش صاحب يا راجل دانت تمشي ع الكورنيش من المنتزة لبحري متعرفش تشوف البحر شكله ايه ولا حتى تشم ريحته ولو راجل من ضهر راجل وفرحان قوي بالشنب اللي تحت مناخيرك اركب مواصلات انشالله حتي حمارة عرجة أولا مش حتلاقي ولو لقيت يبقى تقرا الفاتحة علي روحك ومتنساش تنطق الشهادتين وأنصحك لو ركبت مشروع تنزل منه على أقرب دكتور عظام لأن قعدته حتخشب مفاصلك و حتنزل منه مقرفص زي الكاتب المصري تمام أما لو كنت انتحاري وركبت اوتوبيس فأنصحك تعرض نفسك على أقرب دكتور نسا قبل ما بطنك تقب والفضيحة تبان لأن اللي حيحصلك فيه بجد بجد مش حتقدر تنساه وبيني وبينك والله ولعظيم أنا مش بعرف قيمة اني شنب واحمد ربنا علي كدة ألف مليون مرة غير لما اركب اوتوبيس اما لو كنت من ولاد المحظوظة بتوع الملاكي فده مش معناه ان مش حينوبك م الحب جانب ولو راجل سوق وسط عفاريت الميكروباص وبلطجية التاكسيات ده غير مجانين القاهرة اللي كل واحد فيهم فاكر نفسه مايكل شوماخر في سباق الفورميولا ون أو ربنا يوعدك بواحد ملاكي الغربية ولا الدقهلية يحسسك انه سايق حمارته ع الزراعية وباختصار السواقة حتحرق دمك وتفور أعصابك يعني لو كان عندك ضغط أو سكر يبقى نصيحة مخلصة بلاش تسوق في المولد ده وخدها سلانسيه كده تاتا تاتا ده حتي المشي رياضة طبعا سيادتك فاكر نفسك أرشميدس وبتقول وجدتها وبتقول لنفسك أحسن حاجة اركب تاكسي ولا زحمة زلا حرقة دم يا ختي كميلة جايب الذكاوة دي كلها منين يا عم فاكرها سهلة قال تاكسي قال ببساطة كدة مكنش حد غلب يا عم أولا مادام سيادتك شنب يعني مش مزة صاروخ ولا لابس دشداشة يبقى مفيش تاكسي حيعبرك من أساسه واتلطع يامعلم أما لو كانت الست الوالدة داعيالك وحد وقفلك اوعى تضايق من التناكة والألاطة بتاعة الباشا الأسطى اللي حيكلمك من طرطوفة مناخيره وطبعا حيتأمر ومتقدرش حتي تفتح بقك كأنه كاسر عينك أو ماسك عليك ذلة تقوله المنشية عند المحكمة يقولك ع البحر عند الجندي المجهول تقوله سبورتنج شارع أبو قير يقولك ع الترام تجيله كده يجيلك كده وبلاش تحاول تخنقه كتر خيره الراجل انه وقفلك من أساسه ايه حتنهب صحيح بني آدم ميملاش عينه الا التراب أما الأجرة امسك أعصابك صحتك بالدنيا متضايقش نفسك واللي يقولهولك ادفعه من سكات متخليهوش يقلب ع الوش التاني والله يخرب بيت الغزاة اللي رفعوا أسعار كل حاجة حتي هوا البحر بتاع ربنا يا دوب تلحق خرم ابرة ع البحر وتقعد فيه وتلاقي طوابير من البشر جاية ترخم عليك حاجة ساقعة شاي حلبسة ترمس تسالي ويا سلام لو كانت معاك البلطية بتاعتك او كان معاك العيال وام العيال في الحالة دي تبقي صيدة واتأكد انك حتكع حتكع بالذوق بالعافية مش مهم يبقى لا داعي للمقاومة يا عتريس سلم نفسك المكان كله محاصر.
وطبعا احنا كل ده لسه في مرحلة تركب مواصلة لأن توصل دي حاجة تانية خالص يعني يا عالم توصل امتى ولا بعد ايه المشوار اللي بياخد ربع ساعة بالكتير ممكن ياخد ساعة وزيادة يعني لو عندك مواعيد يا ريت تطلع قبلها ب 24 ساعة ع الأقل عشان تضمن توصل أنا أعرف ناس طلعت الصيف اللي فات ولسة موصلتش لحد النهاردة و متتعبش نفسك كله زحمة آجي من هنا زحمة أروح هنا زحمة هنا أو هنا زحمة البحر زحمة أبوقير موت الترام انسى ياعمرو يبقى بلاش المناورات اللي ملهاش أي فايدة لأن البحر من أمامكم والعدو من خلفكم يعني حتروح فين يا بطل يبقى تسلم أمرك للي خلقك وتقنع نفسك ان الدنيا مش حتطير وان في التأني السلامة وفي العجلة الندامة.
كل ده كوم والمناظر اللي حتشوفها في الصيف كوم تاني خالص يعني لو وانت ماشي ع الكورنيش لقيت فجأة عيل بلبوص شبه الواد اللي باسه جميل راتب في فيلم طيور الظلام لأ يا خفيف ما تبوسهوش ابعد عن سكته وحاسب للمية تطرطش عليك آه هوه انا مقلتلكش يقطعني حتلاقي أمه مالية كام ازازة مية وبتحميه بعد ما بلبط في البحر واتمرمغ في الرملة عادي خالص اعمل نفسك مش شايف حاجة أما لو كنت سايق و لقيت قبيلة من قبايل الزولو بتعدي الكورنيش بمنتهي اللامبالاة مع ان نفق المشاة علي بعد عشرة متر عادي خالص اوعى تتعصب عيب دول ضيوف يعني يعملو اللي هما عاوزينه وطبعا في مناطق اياك اياك تروحها في الصيف انشالله تكون روحك فيهازي المنشية ومحطة الرمل والابراهيمية وطبعا مركز قيادة العدو وغرفة عملياته في ميامي ولو رحت يبقى تقول على روحك يا رحمن يا رحيم الداخل مفقود والخارج مولود أما الأكل والشرب في أي مطعم أو كافيه فمضروب خالص نظام مصيفين بقى ولو مش مصدقني جرب أي حاتي زي بلبع بأش حسني أو بتاع جيلاتي زي مكرم عزة النظامي وشوف الفرق في الصيف كله سلق ف سلق اقلب الزبون أما في الشتا فطبعا آخر وصاية تقعد في أي مكان من دول في الشتا تلاقي مية حواليك تؤمر بايه يا باشا وتدلع بقى على كيف كيف جنابك انما في الصيف تتلطع ساعة عشان حد ييجي يبص ف وشك ولو حد جابلط طلبك ابقى قابلني لو عبرك بعدها ما خلاص قضيت حاجتي من جارتي وبعدين هما فاضيينلك ولا فاضيينلك يبقى كالعادة وزي الشاطر تطفح وانت ساكت ومن غير ما اسمع صوتك فاهم ولا نقول كمان.
طبعا حضرتك مش مصدقني وبتقول كفاية شوية الحريم الموز موز موز اللي بييجوا في الصيف وبيطروا الجو على خلق ربنا وبرغم ان تفكيرك ده واطي وميستاهلش حتي أرد عليه لكن أحب أبشرك ان المزز اللي بجد والحريم الموز موز موز كلها طفشت من الزحمة وهربت على بيانكي ماريناوأكسجين وبلو بيتش يعني مبقاش في غير الحاجات الكحيانة وكل فين وفين لما ربنا يرزق بحتة عليها الطلا وبعدين احنا كمان مش ممكن نتبهدل كل البهدلة دي عشان خاطر بادي ملزق ولا جينز محزق الحاجات دي بقت أكتر م الهم ع القلب ومرطرطة في كل حتة مش ناقص غير انك تفتح الحنفية تلاقيهم نازلين منها وبعدين العبرة بالكيف مش بالكم يعني صاروخ واحد أبرك من ألف طلقة فشنك.
طبعا أظن بعد كل ده بدأت تفهم احنا ليه بنكره الصيف وبنستنى شهر سبتمبر بفارغ الصبر عشان نحتفل برحيل الغزاة وعودة المدينة الجميلة لأحضان ولادها حيث يرفرف علم الاسكندرية خفاقا عاليا و بالنسبة لي شخصيا أنا بحب الشهر ده جدا لأن فيه عيد ميلادي وعيد ميلاد ناس غاليين علي لأ مش أهل اسكندرية يا خفيف وكمان عشان فيه نقدر نقف على كوبري ستانلي ونقول بأعلي صوتنا عاشت اسكندرية حرة مستقلة عاشت اسكندرية حرة مستقلة ايه مالك مش بتنطق ليه يلا قول ورايا عاشت اسكندرية حرة مستقلة وكل سنة وانت طيب وانا طيب وكل الاسكندرانية الجدعان زي الفل و رمضان كريم اشوفكم قريب ان شاء الله.

و عمار يا اسكندرية

أيوة عمار يا اسكندرية وطبعا أحسن ناس كفاية كورنيشها اللي منور من سيدي بشر لأبو العباس على رأي المرحومة اللي هي داليدا وهاتلي انت يا جدع منك له له مدينة تانية جننت الفنانين والشعرا والأدبا غيرها بتفكر في ايه؟هي محتاجة تفكير طبعا مفيش واللي انكتب عنها يملا مجلدات مش كتب حاجات ملهاش أول ولا آخر خد عندك شط اسكندرية لفيروز بتقول ايه مسمعتهاش طب بين شطين ومية لقنديل بتقول ايه مبتحبوش ماشي اتحجج اتحجج ولا يهمنا يااسكندراني للحجار و اسكندرية لمنير وغيره وغيره ولو مسمعتش كل دول أكيد سمعت اسكندرية أحسن ناس ع البحر ماشية تتمختر من سيدي بشر لابو العباس ايوه يا عالم ع المنظر بتاعة داليدا الله يرحمها ويبشبش الطوبة اللي تحت راسها يا عم بقولك دي مدينة جننت الشعرا من أول بابادوبلوس اللي كتب فيها شوية شعر اجريجي بس ايه يستاهلو بقك مروراباعمامنا فؤاد حداد و بيرم ونجم لحد زكي جمعة ومتسألنيش مين زكي جمعة لأني طبعا معرفوش آمنت بقي ان اسكندرية أحسن ناس جميل دلوقتي نقدر نتفق ونفتح لك قلبنا وندلك على اسرار اسكندرية مانت مبقيتش غريب بقيت منا وعلينا زي ما بيقولو أولا الاسكندرانية ناس آخر لذاذة وخفة دم أصحاب مزاج في كل حاجة يعني الكبدة الاسكنراني والفول الاسكندراني والحلبسة اللي طبعاأكيد متعرفش اذا كانت بتتاكل ولا بتتشرب ولا حتى بتتلبس واغششك عشان متقعدش كدة زي الأطرش في الزفة دي مشروب اسكندراني أصيل ميتشربش غير ع البحر وف عز الشتا مش بقولك أصحاب مزاج وعشان تشوف المزاج العالي ده اوعي تيجي في الصيف مع الغزاةاللي معندهمش ولا رحمة ولا قلب لأتعالى في الشتا حتشوف اسكندرية بجد عروسة ع البحر جو محصلش آيس كريم في ديسمبر على رأي عمورة ويا سلام لما تمشي ع البحر ف عز الشتا والجو برد والدنيا بتمطر احساس معرفش اوصفهولك جايز تقول ايه يا عم المجانين دول لكن حاعملك ايه مانت اللي مش من هنا أما اللهجة الاسكندراني فمفيش منها حاجة خفيفة ع الودن والقلب زي نسيم العصاري بالظبط وايه يعني لما نقول شي مش أحسن من شااااااااي بتاعة القهوجية ولا نقول سدق ايوة سدق زي ما سمعت كدة بالظبط انا عارف انها خرمت ودنك احنا أحرار يا سيدي محدش له عندنا حاجة مش بقولك السكندرانية دول أصحاب مزاج ودماغهم عالية قوي قوي قوي صدقتني طيب كويس اسيبك دلوقت ونتقابل قريب لو أذن الرحمن وكل سنة وانت طيب رمضان كريم